A6. ADA LOVELACE

A persoa que inventou o primeiro programa de ordenador foi Ada Lovelace, ou Ada Byron, que naceu en Inglaterra no 1815 e morreu no 1852.

Cando vemos as datas nas que viviu, a primeira pregunta que nos vén á cabeza é: ‘… pero, no século XIX había ordenadores?’. Pois non; ela fixo o primeiro programa de ordenador no papel, pero nunca chegou a velo funcionar nunha máquina.

Ela quería construír máquinas que fixesen operacións máis complicadas que as calculadoras mecánicas básicas que só facían sumas, restas, multiplicacións e divisións.

Para acadar o seu invento inspirouse nos teares industriais de Inglaterra da época. Ela uniu o formalismo das matemáticas e da física da súa nai e a súa institutriz Mary Sommerville e a creatividade e fantasía do seu pai, que era un poeta romántico.

O seu invento consiste en que as máquinas poidan executar 4 operacións que son comúns na nosa vida diaria (e que veremos detidamente na actividade 14):

  • Realizar unha tarefa despois doutra (secuencialidade): almorzo, veño ó colexio, xogo no recreo, etc.
  • Decidir entre unha ou máis opcións en función do contexto ou dalguna condición (bifurcacións): se é pola mañá vou ó cole e se é pola tarde vou ó parque (en función da hora que é decido facer unha tarefa ou outra).
  • Repito unha tarefa ou conxunto de tarefas un número concreto de veces. Todos os días da semana (7 veces) repito: levantarme, vestirme e almorzar.
  • Repito un número de veces indeterminado: salta mentres que eu canto. O número de saltos que das depende do rápido que saltes e do tempo que estou cantando.